12:24 PM
minnanda
အမျိုးသားဒီမိုကရေစီအဖွဲ့ချုပ်ကို နိုင်ငံရေးပါတီများ မှတ်ပုံတင်ခြင်း ဥပဒေနှင့်အညီ မှတ်ပုံတင်မည်၊ နောင်လာမည့် ရွေးကောက်ပွဲများတွင် ၀င်ရောက်ယှဉ်ပြိုင်အရွေးခံမည်ဖြစ်ကြောင်း အမျိုးသားဒီမိုကရေစီအဖွဲ့ချုပ်က အထူးကြေညာချက် ဒီကနေ့ ထုတ်ပြန်ခဲ့သည်။
ဗဟိုဦးစီးအဖွဲ့ အစည်းအဝေး ပြုလုပ်နေစဉ် (ဓါတ်ပုံ - Eleven Media Group)
အထူးကြေညာချက် အမှတ်- ၁/ ၁၁/ ၁၁ ကို ဒီကနေ့ပြုလုပ်သည့် အဖွဲ့ချုပ် ဗဟိုအလုပ်အမှုဆောင်အဖွဲ့ အစည်းအဝေးဆုံးဖြတ်ချက်အရ ထုတ်ပြန်ခဲ့ခြင်းဖြစ်သည်။
အဆိုပါကြေညာချက်တွင် အဖွဲ့ချုပ်သည် တွေ့ဆုံဆွေးနွေးရေးနှင့် အမျိုးသားပြန်လည်သင့်မြတ်ရေးကို အစဉ်တစိုက်ကြိုးပမ်းအားထုတ်လျက်ရှိကြောင်း အဖွဲ့ချုပ်၏မူများဖြစ်သော အဃာတကင်းစင်သော အထွေထွေသဟဇာတဖြစ်မှုကို ရှေးရှုရေး၊ ငြိမ်းချမ်းချောမွေ့သောနည်းကို အသုံးချရေး၊ အပြန်အလှန် ပူးပေါင်းဆောင်ရွက်ရေးတို့ကိုလည်း စွဲကိုင်လျက်ရှိကြောင်း အစချီဖော်ပြသည်။
ဒီကနေ့ကျင်းပသည့် ဗဟိုဦးစီးအဖွဲ့ အစည်းအဝေးအဖွင့်မိန့်ခွန်းပြောကြားရတွင် အမျိုးသားဒီမိုကရေစီအဖွဲ့ချုပ် အထွေထွေအတွင်းရေးမှူး ဒေါ်အောင်ဆန်းစုကြည်က ဒီကနေ့ဆိုလို့ရှိရင် ကျမတို့ အမျိုးသားဒီမိုကရေစီ အဖွဲ့ချုပ်အတွက် အရေးကြီးတဲ့ ဆုံးဖြတ်ချက်တွေကို ချရမှာဖြစ်ကြောင်းနဲ့ ဒီလိုဆုံးဖြတ်ချက်မျိုး အရင်နှစ်ခေါက် ချဘူးကြောင်း၊ အဲဒီနှစ်ကြိမ်စလုံး သူမ မပါဝင်ခဲ့ရဘဲ သုံးကြိမ်မှာ ပထမဦးဆုံးပါဝင်ခဲ့ကြောင်း အစချီကာ “အရင် ၁၉၉၀ ခုနှစ် ရွေးကောက်ပွဲနဲ့ပတ်သက်လို့ပဲဖြစ်ဖြစ်၊ ၂၀၁၀ ရွေးကောက်ပွဲနဲ့ ပတ်သက်လို့ပဲဖြစ်ဖြစ် အများရဲ့ဆုံးဖြတ်ချက်ကို လက်ခံခဲ့ပါတယ်။ ကျမသဘောတူတာ မတူတာဟာ အဓိက မဟုတ်ပါဘူး။ ကျမရဲ့ ဆန္ဒတွေလည်းရှိပါတယ် ကျမရဲ့အမြင်တွေလည်းရှိပါတယ် ဒါပေမယ့် နောက်ဆုံးတော့ ဒီမိုကရေစီနည်းအရ အများရဲ့ဆုံးဖြတ်ချက်ကို လက်ခံရမှာ ဖြစ်ပါတယ်။ ကျမက အများရဲ့ဆုံးဖြတ်ချက်ကို လက်ခံတယ်ဆိုတာဟာ မည်ကာမတ္တ လက်ခံတာကိုပြောတာ မဟုတ်ပါဘူး။ တကယ်ပဲ လက်ခံတယ်ဆိုရင် စိတ်ရောကိုယ်ပါ လုပ်ရပါလိမ့်မယ် ဆုံးဖြတ်ချက်မချခင်မှာ ကိုယ့်ရဲ့အမြင်ကို တင်ပြချင်သလို တင်ပြလို့ရတယ်။ကိုယ်သဘောတူတာ မတူတာကို ပွင့်ပွင့်လင်းလင်းဆွေးနွေးလို့ရတယ်။ ဒါပေမယ့် ဆုံးဖြတ်ချက်ချပြီးပြီဆိုလို့ရှိရင် အဲဒီချမှတ်တဲ့ ဆုံးဖြတ်ချက်အတိုင်း စိတ်ရောကိုယ်ပါ လိုက်ပြီးလုပ်ပေးရမှာက ဒါဟာ ဒီမိုကရေစီတာဝန်တခု ဖြစ်တယ်ဆိုတာကို ကျမအားလုံးကို နားလည်စေချင်ပါတယ်” ဟု ပြောကြားခဲ့သည်။
ဒေါ်အောင်ဆန်းစုကြည်က အစည်းအဝေးကိုတက်ရောက်လာသည့် ဗဟိုဦးစီးအဖွဲ့ဝင်များကို တနိုင်ငံလုံးအတွက် စဉ်းစားပြီး ဆုံးဖြတ်ချက်ချဖို့လည်း “မှန်ကန်တဲ့လမ်းလို့ မြင်တဲ့ လမ်းကိုလျှောက်ဖို့ ပြင်ဆင်ကြပါ။ ကျမတို့ ဒီမှာ ပြောတဲ့အခါမှာ ကိုယ်တဦးတယောက်အတွက် မဟုတ်၊ ကိုယ့်ရဲ့ အုပ်စုလေးအတွက် မဟုတ်၊ ကိုယ့်မြို့နယ်အတွက်မဟုတ် ကိုယ့်တိုင်းအတွက် ကိုယ့်ပြည်နယ်အတွက် မဟုတ်ဘဲနဲ့ ကျမတို့ တနိုင်ငံလုံးအတွက် စဉ်းစားပြီးတော့ ဆုံးဖြတ်ချက်ချကြပါလို့ ကျမမေတ္တာရပ်ခံချင်ပါတယ်” ဟု ပြောကြားသည်။
ဗဟိုဦးစီးအဖွဲ့ အစည်းအဝေးကို ရန်ကုန်၊ ဗဟန်းမြို့နယ် ရွှေဂုံတိုင်လမ်းရှိ အဖွဲ့ချုပ်ရုံးချုပ်တွင် မနက် (၁၀)နာရီ က စတင်ခဲ့ပြီး နေ့လည်ပိုင်းတွင် ပါတီမှတ်ပုံပြန်တင်ပြီး ရွေးကောက်ပွဲဝင်ရေးအတွက် ပြည်နယ်နှင့်တိုင်း (၁၄)ခုမှ ဗဟိုဦးစီးအဖွဲ့ဝင်များ ညီနောင်ပါတီဖြစ်သော အမျိုးသားဒီမိုကရေစီပါတီနှင့် အဖွဲ့ချုပ်ဗဟို အမျိုးသမီးလုပ်ငန်းအဖွဲ့တို့မှ ဗဟိုဦးစီးအဖွဲ့ဝင်များ လူငယ်လုပ်ငန်းများဖော်ဆောင်ရေးမှ ကိုယ်စားလှယ်များ တက်ရောက်ခွင့်ရှိသူ (၁၁၆)ဦးအနက် (၁၀၆) ဦး တက်ရောက်ခဲ့ကြောင်း အထူးကြေညာချက်တွင် ဖော်ပြထားသည်။
နိုဝင်ဘာလ ၁၆ ရက်နေ့ ရက်စွဲဖြင့် အမျိုးသားဒီမိုကရေစီအဖွဲ့ချုပ် လူငယ်လုပ်ငန်းများဖော်ဆောင်ရေးအဖွဲ့ချုပ်က အမျိုးသားဒီမိုကရေစီအဖွဲ့ချုပ် (NLD) ပါတီ ပြန်လည်မှတ်ပုံတင်ရန်နှင့် ရွေးကောက်ပွဲများတွင် ပါဝင်ယှဉ်ပြိုင်ရန် သဘောထား ထုတ်ပြန်ခဲ့ပြီး ဖြစ်သည်။
0 comments:
Post a Comment