မီဒီယာကိုမီဒီယာနဲ့ တိုက်မယ့် ဝန်ကြီးနဲ့စကားပြောခဲ့တဲ့ VOA ဌာနမှူးနဲ့တွေ့ဆုံခြင်း

ဝါရှင်တန် အခြေစိုက် VOA အသံလွှင့်ဌာန၏ မြန်မာပိုင်းအစီအစဉ် ဌာနမှူး ဦးသန်းလွင်ထွန်းသည် မကြာသေးမီက မြန်မာပြည်သို့ သွားရောက်လည်ပတ်ခဲ့ပြီးယဉ်ကျေးမှုနှင့် ပြန်ကြားရေးဝန်ကြီးဌာန ပြည်ထောင်စု ဝန်ကြီး ဦးကျော်ဆန်းနှင့် တွေ့ဆုံဆွေးနွေးခဲ့သည့်အပြင် ပြည်တွင်း မီဒီယာလောက အခြေအနေကိုလည်း လေ့လာခဲ့သည်။

VOA ဌာနမှူး ဦးသန်းလွင်ထွန်း (ဓာတ်ပုံ - ဧရာဝတီ)

VOA အစီအစဉ်များထဲမှ တချို့ကို ပြည်တွင်း FM တချို့တွင် ထုတ်လွှင့်ခွင့်ရရေးအတွက် ဝန်ကြီး ဦးကျော်ဆန်းနှင့် ဆွေးနွေးခဲ့သည် ဆိုသော ဦးသန်းလွင်ထွန်းအား ပြန်ကြားရေးဝန်ကြီးဌာန၊ ပြည်တွင်း မီဒီယာလောက အနေအထားအပါအဝင် VOA အသံလွှင့်မှုပိုင်းဆိုင်ရာ ကိစ္စရပ်များကို ဧရာဝတီသတင်းထောက် ဝေမိုးနှင့် အေးချမ်းမြေ့တို့က တွေ့ဆုံဆွေးနွေး ထားပါသည်။
မေး။     ။ ဝန်ကြီး ဦးကျော်ဆန်းကို ဘယ်လိုမြင်လဲ။ မီဒီယာနဲ့ ပတ်သက်တဲ့ သူ့ရဲ့ သဘောထားပေါ့။
ဖြေ။     ။ ကျနော်ကလည်း တခါပဲတွေ့တာကိုး။ သူပြောတာကတော့ ရှင်းပါတယ်။ မီဒီယာနဲ့ ပတ်သက်တဲ့ သဘောထား ဆိုရင် ကျနော်တို့ဆီက ဒေါ်ခင်စိုးဝင်း သူ့ကို မေးထားတာကို ပြန်ဖြေသလိုပဲပေါ့။ အတော်ရှင်းတယ်။ ဥပမာ မီဒီယာကို မီဒီယာနဲ့ တိုက်တာမျိုး လုပ်ဦးမလား ဆိုတော့၊ အဲဒီနေရာမှာ သူပြန်ရှင်းလိုက်တာက ရှင်းရှင်းလေးပဲ။ ခင်ဗျားတို့ နိုင်ငံတကာ မှာကော မီဒီယာကို မီဒီယာနဲ့ တိုက်တာ မရှိဘူးလား ဆိုတဲ့ အမြင်မျိုးပေါ့။ အဲဒီအမြင်မျိုးကတော့ သူ့အနေနဲ့ နည်းနည်း မှားနေတယ်လို့ ပြောလို့ရတာပေါ့။
ဥပမာ – ကျနော်တို့ကို VOA ဆိုပြီးတော့ အမေရိကန် အစိုးရက ထောင်ပေးထားပြီး မြန်မာနိုင်ငံကို မီဒီယာနဲ့တိုက်ဖို့ လုပ်ပေး ထားတာဆိုတဲ့ အမြင် ရှိပုံရတယ်။ ဒါက မှားတာပေါ့။ ဒါကြောင့်မို့လို့ ကျနော် သူ့ကို VOA ရဲ့ ချာတာကို သေချာပုံနှိပ်ပြီး လက်ဆောင်ပေးလိုက်တယ်ဗျ။ သူကမေးတယ် ဒါ ဘာကြီးလဲတဲ့။ ကျနော် သူ့ကို ရှင်းပြ လိုက်ပါတယ်။ ကျနော်ကလည်း ရှင်းပြ ချင်လို့ကို သူ့ကို ပေးလိုက်တာပါ။ အဲဒီထဲမှာ ဘာပါလဲဆိုတော့ VOA ကိုစလွှင့်တာက ၁၉၄၂ ခုနှစ်၊ ထုံးစံအတိုင်း အစပိုင်း ကတော့ သူတွေးသလိုမှန်တယ်။ စထောင်တုန်းက အမေရိကန် အစိုးရရဲ့ မူဝါဒ ဖြန့်ချိ ရေးအတွက်လုပ်တယ်၊ ဒါပေမယ့် ခေတ်ပြောင်းလာတော့ မူဝါဒ ဖြန့်ချိရေးအတွက် မလုပ်တော့ဘူး။ မလုပ်တော့ဘဲနဲ့ VOA ဆိုတာ အစိုးရရဲ့ ဝါဒ ဖြန့်ချိဖို့ မဟုတ်တော့ဘဲနဲ့ တကယ့် ဂျာနယ်လစ်ဇင် အဖွဲ့အစည်းတခုအနေနဲ့ အမေရိကန် လူ့အသိုင်းအဝန်းရဲ့ တန်ဖိုးကို နိုင်ငံတကာက မြင်အောင်၊ အမေရိကန် လူ့အသိုင်းအဝန်းရဲ့ တန်ဖိုးက ဒီမိုကရေစီပေါ့၊ ဒါကို ဖော်ဆောင်နိုင်ရမယ်၊ အစိုးရကိုလည်း ဘက်ပေါင်းစုံက ဝေဖန်နိုင်ရမယ်၊ အကြံပြုနိုင်ရမယ်၊ အစိုးရဲ့ ဝါဒဖြန့်ချိရေး သက်သက် မဟုတ်ဘူးဆိုတာ ဒီ ချာတာထဲမှာ ရေးထားတယ်၊ ဒါကို ဦးကျော်ဆန်းကို ရှင်းပြလိုက်တယ်။
ကျနော်တို့တွေကPublic Service ပေါ့၊ Commercial Service မဟုတ်ဘူး။ Public Service ဆိုတာက အစိုးရရဲ့ ထောက်ပံ့ မှုနဲ့၊ ဒါမှမဟုတ် လူထုထဲက အလှူရှင်တွေရဲ့ ထောက်ပံ့မှုနဲ့ ရပ်တည်ပြီး အလုပ်လုပ်တယ်၊ အမြတ်အစွန်းမယူဘဲ လူထုကို သတင်းပေးတယ်။ သဘောက BBC လိုပဲ၊ သူလည်း ဗြိတိန် ပါလီမန်ကနေ ပေးတဲ့ ငွေကြေးနဲ့ လူထုကို သတင်းတွေ ပေးရတာ။ ကြော်ငြာမပါဘူး။ အစိုးရထောက်ပံ့တယ်၊ ဒါပေမယ့် အစိုးရရဲ့ ဝါဒဖြန့်တဲ့၊ အစိုးရအသုံးချခံ မဟုတ်ဘူး။ ဒါကို သူ့ကို သိစေချင်လို့ ကျနော်တို့ ချာတာကို ပေးလိုက်တာ။
မေး။     ။ မီဒီယာနဲ့ပတ်သက်လို့ ဦးကျော်ဆန်းက အမာလိုင်းလို့ ပြောကြတယ်။ အဲဒါကို ဘယ်လိုထင်လဲ။ ကိုသန်းလွင်ထွန်းနဲ့ တွေ့တဲ့အခါမှာ မြင်ရတဲ့ ပုံစံပေါ့။
ဖြေ။     ။ သူ့မှာ ပြုပြင်ပြောင်းလဲချင်တဲ့ ဆန္ဒလေး ရှိတယ်လို့တော့ ကျနော်မြင်တယ်ဗျ။ ဘာဖြစ်လို့လဲ ဆိုတော့ သူက ကျနော့်ကိုမေးတယ်။ မြန်မာ့အလင်းနဲ့ ပတ်သက်လို့ ဘယ်လိုမြင်လဲတဲ့။ မြန်မာ့အလင်းကို ဖတ်ဖြစ်လား၊ ဒီ သတင်းစာတွေကို ပြုပြင်ပြောင်းလဲချင်ရင်၊ ပိုကောင်းချင်ရင် ဘယ်လိုလုပ်ရမလဲပေါ့။ ကျနော်ကလည်း ပွင့်ပွင့်လင်းလင်း ပြောလိုက်တယ်။ ဝန်ကြီးမေးလာလို့ ကျနော်ပြောမယ်လို့၊ ဒီဟာကို VOA ဌာနမှူးအနေနဲ့ ကျနော် ပြောတာမဟုတ်ဘူး၊ ဂျာနယ်လစ် တယောက် အနေနဲ့ ကျနော်ပြောတာလို့၊ ဝန်ကြီးတို့ သတင်းစာတွေက အစိုးရ ဂေဇတ်၊ အစိုးရရဲ့ ပြန်တမ်းလို့၊ ဒါ သတင်းစာ မဟုတ်ဘူး၊ ဘာဖြစ်လို့လဲ ဆိုတော့ ဝန်ကြီးတို့ဆီမှာ သတင်းလည်း သတင်းအလျောက် မဟုတ်ဘူး၊ အစိုးရက ပြောချင်တဲ့၊ ဖော်ပြချင်တဲ့ ပြန်တမ်းတွေနဲ့ ရောနေတယ်လို့။
နိုင်ငံတကာမှာ အစိုးရရဲ့ အာဘော်ကို ထင်ဟပ်တဲ့ သတင်းစာရှိတယ်၊ စီးပွားရေးသမားတွေရဲ့ အာဘော်ကို ထင်ဟပ်တဲ့ သတင်းစာတွေရှိတယ်၊ နိုင်ငံရေး ပါတီတွေရဲ့ အာဘော်တွေကို ထင်ဟပ်တဲ့ သတင်းစာတွေရှိပါတယ်၊ ဒါပေမယ့် အာဘော်နဲ့ သတင်းနဲ့က ခွဲထားကြတယ်၊ ဝန်ကြီးတို့ဆီမှာတော့ ခွဲထားတာ မတွေ့ရဘူး။ ဒီတော့ ဒီလိုမျိုးခွဲမထားဘူးဆိုရင် ဖတ်တဲ့သူတွေ အနေနဲ့ နိုင်ငံတော် ပြန်တမ်း၊ အစိုးရဂေဇတ်အနေနဲ့ပဲ လက်ခံနေမှာပဲ၊ သတင်းစာတခု အနေနဲ့တော့ လက်ခံမှာမဟုတ်ဘူးလို့။ အဲဒီတော့ တကယ်လို့သာ မြန်မာနိုင်ငံမှာ လွတ်လပ်တဲ့ သတင်းစာတွေ တကယ်ပေါ်လာပြီဆိုရင်တော့ ဝန်ကြီးတို့ သတင်းစာတွေ ဒုက္ခရောက်လိမ့်မယ် လို့၊ အဲဒီအတိုင်းပဲ ပြောခဲ့တယ်။
မေး။     ။ ပြည်တွင်းမှာ ဝန်ကြီး ဦးကျော်ဆန်းနဲ့ တွေ့ပြီး အထဲမှာ FM လွှင့်ဖို့ကိစ္စ ပြောခဲ့တယ်လို့ သိရပါတယ်။ အဲဒီကိစ္စ ပြေလည်ခဲ့လား။
ဖြေ။     ။ ပြေလည်တယ်လို့ ပြောလို့ရတယ်။ အဓိကကတော့ ကျနော်တို့လွှင့်နေတဲ့ အစီအစဉ်တွေထဲမှာ နိုင်ငံတကာသတင်း၊ အင်္ဂလိပ်စာပို့ချချက်၊ ကျန်းမာရေး၊ သိပ္ပံနည်းပညာ၊ အမေရိကန်တခွင် စသည်ဖြင့် ကောင်းနိုးရာရာတွေကို ကျနော်တို့ကနေ ပို့ပေး၊ မြန်မာ့ရုပ်မြင်သံကြားမှာဖြစ်ဖြစ်၊ မြန်မာ့အသံမှာဖြစ်ဖြစ်၊ ပြည်တွင်းမှာ ရှိနေတဲ့ FM station တွေမှာ ဖြစ်ဖြစ် လွှင့်ပေးဖို့ ဝန်ကြီးက သဘောတူတယ်။ ဒါပေမယ့် သူတို့က ဒီလိုအရင် အလားတူလုပ်တာတွေ ရှိနေတယ်။ ဥပမာ – VOA အနေနဲ့ အင်ဒိုနီးရှားမှာ၊ ကမ္ဘောဒီးယားမှာ၊ နောက် ချင်းမိုင်မှာတောင် ကျနော်တို့ အလားတူ လုပ်နေတာတွေ ရှိတာပဲ။ ချင်းမိုင်မှာဆို ရွှေ့ပြောင်းအလုပ်သမားတွေအတွက် ထပ်ဆင့် လွှင့်ပေးနေတာတွေပေါ့၊ ဒီလို အလားတူ လုပ်နေတာတွေကို တဘက်နဲ့တဘက် သဘောတူညီချက် (MOU) ဘယ်လိုထိုးလဲ ဆိုတာကို ကြည့်ချင်တယ်။ ဒီတော့ ကျနော်က ဝါရှင်တန် ပြန်သွားပြီးရင် အဲဒါလေးတွေကို သူတို့ကို ပို့ပေးရမယ်။
သူတို့ကလေ့လာပြီး သဘောတူတယ်ဆိုရင် ဒီဘက်က ဘန်ကောက်မှာထိုင်တဲ့ Regional Marketing Officerကို ခေါ်သွားပြီး နောက်တခေါက် ထပ်သွားရမယ်။ ဒီတခေါက်က ဘာလုပ်မယ် မှန်းတောင် မသိသေးဘူး။ မြေစမ်း ခရမ်းပျိုးအနေနဲ့ နားထောင်ဖို့ သွားတာပဲ။ ဒါပေမယ့် သဘောတူလာပြီ ဆိုတော့ နောက်တခေါက်ကတော့ ဒါကို အကောင်အထည်ဖော်ဖို့ လုပ်ရမှာပေါ့။ ဒါပေမယ့် ပြည်တွင်းမှာ VOA သတင်းထောက် ထားဖို့၊ ရုံးခန်းဖွင့်ဖို့ ဆိုတာတွေကိုတော့ ဝန်ကြီးက ဖြည်းဖြည်းပေါ့ လို့ပဲ ပြောတယ်။
မေး။     ။ ဒီကိစ္စနဲ့ ပတ်သက်လို့ ဘယ်လိုထင်လဲ၊ ကျန်တဲ့ ရေဒီယို စတေရှင်တွေ အများကြီးရှိရဲ့သားနဲ့ ဘာလို့ VOA နဲ့ ရွေးတွေ့တယ် ထင်လဲ။
ဖြေ။     ။ ကျနော်ထင်တာကတော့ အနှေးနဲ့အမြန် ဆိုသလို လာမှာပဲလို့ထင်တယ်။ ကျနော်သိသလောက်တော့ BBC လည်း ကြိုးစားနေတာပဲ၊ သြစတြေးလျမှာရှိတဲ့ ABC ဆိုလည်း မြန်မာပြည်ထဲဝင်ဖို့ ကြိုးစားနေတာပဲ။ ဘာကြောင့်လဲဆိုတော့ ရေဒီယို စတေရှင်တွေရဲ့ ရည်မှန်းချက်က ကိုယ်လွှင့်နေတဲ့ အစီအစဉ်တွေကို ပြည်တွင်းမှာများများစားစား ပိုကြားဖို့လေ။ အခု လောလောဆယ်က Short Wave (SW) တွေနဲ့ လွှင့်နေကြတယ်၊ ဟုတ်နေသေးတယ်။ ဒါပေမယ့် ရေရှည်မှာ SW တွေ ပျောက်သွားတော့မှာ။ အဲဒီအခါကျရင် Medium Wave တွေ၊ FM တွေပဲ ကျန်ခဲ့တော့မယ်။ အခု နိုင်ငံတကာမှာ လုပ်နေတာက သက်ဆိုင်ရာ နိုင်ငံတွေမှာ ရှိနေတဲ့ Medium Wave station တွေ FM station တွေနဲ့ ပါတနာ ပုံစံမျိုးလုပ်ပြီး ကိုယ့်အစီအစဉ်တွေကို လွှင့်ရတဲ့ အလားအလာ ဖြစ်နေပြီလေ။
အဲဒီတော့ မြန်မာပြည်မှာလည်း အဲဒီလို မလုပ်နိုင်သေးလို့သာ ကျနော်တို့က SW ကို သုံးနေရတာ။ ချန်ထားရတာ။ ဒါပေမယ့် အမေရိကားမှာလည်း အော်လှပြီ။ SW Broadcasting က တကယ်တော့ ဈေးကြီး တယ်ဗျ။ ဟိုးတုန်းက ဆိုရင် နိုင်ငံတကာကို SW နဲ့ လွှင့်နေတာဆိုတော့ မထောင်းသာဘူး။ ဥပမာ ကျနော်တို့ မြန်မာနိုင်ငံ တခုတည်းကို မဟုတ်ဘဲ ထိုင်းနိုင်ငံကိုလည်း SW နဲ့ လွှင့်တယ်၊ တရုတ်ကို၊ ကာဇက်စတန်တို့ ဘာတို့ကိုလည်း လွှင့်နေတယ်။ စတေရှင် တခုတည်းကနေပြီး နိုင်ငံတွေ အများကြီးကို လွှင့်နေတာဆိုတော့ အဆင်ပြေတယ်။ ဒါက ကိုက်တယ်။ ဒါပေမယ့် တဖြည်းဖြည်းနဲ့ အဲဒီနိုင်ငံတွေက ဖြတ်လိုက်တော့ SW လွှင့်တဲ့ နိုင်ငံက နည်းသွားပြီ။ မြန်မာ တနိုင်ငံတည်း အတွက်တော့ SW စတေရှင်ကြီးတခုကို VOA က တည်ဆောက် မထားနိုင်တော့ဘူး။ ကြာရင်ပေ့ါ။
ကျနော်တို့က ဆက်ပြီးတော့ လွှင့်ချင်တယ် ဆိုရင်တော့ Local partnership တွေကို ရှာရတာပဲ။ ဒီနအချိန်မှာ အခွင့်အရေး ပေးလာတော့ ကျနော်တို့ သွားညှိကြတယ်။ ညှိတဲ့ နေရာမှာတော့ လောလောဆယ်မှာ ကိုယ်လိုချင်သလောက်တော့ ဘယ်ရမလဲ။ မြန်မာ အစိုးရကျတော့ လောလောဆယ်မှာ သူ့နည်းသူ့ဟန်နဲ့ Sensitivity က ရှိနေသေးတော့ ကျနော့် အစီအစဉ်ထဲမှာ မြန်မာနဲ့ ပတ်သက်တာကိုတော့ လိုချင်သေးတဲ့ပုံ မပေါ်ဘူး။ ကျနော်ကလည်း သိပ်ပြီး တွန်းအားမပေးပါဘူး။ လောလောဆယ်တော့ ရသလောက်ပဲပေါ့။
မေး။     ။ မြန်မာပြည်တွင်းမှာ ပုဂ္ဂလိက နေ့စဉ်သတင်းစာတွေ လုပ်ခွင့်ရတော့မယ်ဆိုတဲ့ သတင်းတွေလည်း ထွက်နေတယ်၊ ကိုသန်းလွင်ထွန်း တွေ့ခဲ့တဲ့သူတွေ ထဲမှာလည်း သတင်းစာလုပ်ခွင့်ရဖို့ မျှော်လင့်နေတဲ့ ထုတ်ဝေသူတွေ၊ အယ်ဒီတာချုပ် တွေ ပါတယ်ဆိုတော့ အဲဒီကိစ္စကိုကော ဘယ်လိုထင်လဲ။ နီးပြီလို့ထင်လား။
ဖြေ။     ။ အဲဒါကတော့ ကောလာဟလတွေပဲ။ လူတိုင်းကတော့ မျှော်လင့်ချက် အမျိုးမျိုး ရှိကြမှာပေါ့နော်။ ကျနော်လည်း ကောလာဟလ အမျိုးမျိုးကြားခဲ့တာပဲ။ ဂျာနယ်တိုက်ကြီးတွေက တိတ်တိတ်ကလေး ကြိတ်ညှိနေတယ်၊ နေ့စဉ်သတင်းစာ ထုတ်ဖို့ ပြင်ဆင်နေတယ် ဆိုတာမျိုးပေါ့။ ခင်ဗျားတို့လည်း ကြားမှာပါ။ ကျနော်လည်း ဝန်ကြီးဦးကျော်ဆန်းကို မေးလိုက် ပါတယ်။ ပုဂ္ဂလိက နေ့စဉ်သတင်းစာ ထုတ်ခွင့်ပေးဖို့ အခြေအနေ ဘယ်လိုရှိလဲပေါ့၊ အဲဒီလိုမေးတော့ သူက လုပ်လာပါ လိမ့်မယ် ဖြည်းဖြည်းပေါ့လို့ပဲ ဖြေသွားတယ်။ ဒါပေမယ့် ကျနော်နဲ့တွေ့တဲ့ကိစ္စမှာ ဒီလိုဟာတွေထက် ကျနော်တို့ အလုပ်ကိစ္စကို သေချာ ပြောဖြစ်တာ ပိုများတယ်။ ဘာကြောင့်လဲဆိုတော့ ရတဲ့အချိန်မှာ ဒီလို ကျယ်ပြန့်တဲ့ သတင်းစာလွတ်လပ်ခွင့်တို့ ဘာတို့ ပြောပြီးတော့ မလိုအပ်ဘဲနဲ့ ငြင်းခုန်နေတာထက်၊ ကျနော့်အလုပ်ပဲ ပြောဖြစ်တယ်။ သူ့ကို ကျနော် အင်တာဗျူးလုပ်တာလည်း မဟုတ်ဘူးလေ။ သူ့အနေနဲ့လည်း သူ့ဘက်က လိုချင်တာတွေ ပြောတယ်၊ ကျနော့်ဘက်ကလည်း လုပ်ပေးနိုင်တာ၊ လိုချင်တာ ပြောတယ်၊ ဒါပါပဲ။
မေး။     ။ အလုပ်ကိစ္စနဲ့ ပတ်သက်တဲ့ အစီအစဉ်တွေ ဖြစ်ဖို့ အချိန်ဘယ်လောက် ကြာလိုက်လဲ။
ဖြေ။     ။ မကြာဘူး။ ရှင်းရှင်းပြောရရင် ကျနော်တို့ဆီက ဒေါ်ခင်စိုးဝင်းသွားတယ်၊ အဲဒီလို သွားတဲ့အချိန်မှာ ဒေါ်ခင်စိုးဝင်းကို သူလည်း ပြောပုံရပါတယ်။ ခင်ဗျားတို့ အပြင်ကလူတွေလည်း ကျနော်တို့ကို ကူဖို့လိုတယ် ဆိုတာမျိုးပေါ့။ အဲဒီလို ရင်းရင်းနှီးနှီး ပြောတဲ့ အခါ ကျတော့ အပြင်ကကူဆိုရင်တော့ ကျမတို့ဌာနမှူးတွေ ဘာတွေခေါ်ပြီးတော့ စီစဉ်မှဖြစ်မယ်၊ အဲဒီကိစ္စ စီစဉ်မလား လို့ မေးလိုက်တော့ ဖြစ်ပါတယ် ကျနော်တို့လုပ်ပေးတာပေါ့ လို့ ပြန်ပြောတယ်၊ ဒါပေမယ့် နောက်ပိုင်း မဆက်သွယ်ဖြစ်ဘူး။ နောက်ပိုင်း ဘာလီမတိုင်ခင်ကိစ္စ လေးတွေကျမှ သတင်းထောက်တွေ ပုံမှန်လာဖို့ ကိစ္စဘယ်လိုလဲ၊ ကျမတို့ ဌာနမှူးနဲ့ ဆက်သွယ်တော့မလားလို့ မေးတော့မှ သူ့ဘက်က စီစဉ်လိုက်ပါဆိုပြီးညွှန်ကြားလိုက်တာ။ ဘာမှ သိပ်မကြာလိုက်ပါဘူး။ ဌာနတိုင်း ချဉ်းကပ်နေတာပါပဲ။ ကျနော်တို့ ရေဒီယို ဌာနကြီးတွေတင် မကဘဲ ခင်ဗျားတို့ ပြည်ပ မီဒီယာတွေပါ ချဉ်းကပ် နေတယ်လို့ ကြားခဲ့ပါတယ်။ ကျနော်ကတောင် နောက်ကျချင်ကျနေပါဦးမယ်။
မေး။     ။ ပြည်ပက မီဒီယာတွေကလည်း ပြည်တွင်းကို ဝင်ချင်နေကြတယ် ဆိုတဲ့ အသံတွေ ထွက်နေတယ်ဆိုတော့ ဒီကိစ္စကော ၂၀၁၅ မတိုင်ခင် ဖြစ်လာနိုင်မယ် ထင်လား။
ဖြေ။     ။ ဖြစ်လာပါလိမ့်မယ်။ ကျနော်ထင်တာတော့ တခုပြီး တခု ဝင်လာကြမှာပါ။ VOA တခုတည်းကိုတော့ သီးသန့်ကြီး ပေးတယ်လို့ ကျနော် မထင်ပါဘူး။ ကျနော် ပထမ စိတ်ထဲမှာထင်တာက အားလုံးနဲ့ စုပြုံပြီး တွေ့ရမယ်တောင်ထင်တာ။ တယောက်တည်းလို့ မထင်ဘူးလေ။
မေး။     ။ FM လို ထပ်ဆင့်အသံလွှင့်ခွင့် ရမယ်ဆိုတာ နည်းတဲ့ အခွင့်အရေးမဟုတ်ဘူးလေ။ ဒီအပေါ်မှာ ကိုသန်းလွင်ထွန်း ဘယ်လို ခံစားရလဲ။
ဖြေ။     ။ ဒါက လက်တွေ့ မဖြစ်သေးဘူးလေ။ လုပ်ရမယ့် အဆင့်တွေ အများကြီး ကျန်ပါသေးတယ်။ သူတို့ရဲ့ အစီအစဉ်တွေ လိုက်ပြတယ်၊ ဘယ်လိုလွှင့်တယ် ဘာညာကျနော် လိုက်ကြည့်တယ်။ ကျနော်ပြန်သွားပြီး MOU တွေ ပို့လိုက်လို့ သူတို့ သဘောတူရင် နောက်တခေါက် ပြန်လာပြီး လက်မှတ်ထိုးရမယ်။ လိုတာတော့ လိုသေးတယ်၊ တလ နှစ်လနဲ့ အကောင် အထည် ဖော်ဖို့တောင် မလွယ်သေးဘူး။ နောက်တခုက နည်းပညာ ပြဿနာလည်းရှိသေးတယ်။ FM ဆိုတာကလည်း တကယ်တော့ Semi government ဗျ။ လွတ်လပ်မှု လုံးလုံးရှိတာတော့ မဟုတ်ဘူး။ သူတို့ သီချင်းတွေဖွင့်တယ်၊ စကားဝိုင်းလေးတွေ သူတို့ဘာသာ ဖန်တီးတယ်။ နိုင်ငံတကာသတင်း၊ ရီဂျင်နယ် သတင်းတွေကျတော့ သူတို့မှာ capacity မရှိတော့ ဂျာနယ်တွေကဟာတွေ ယူပြီး ဖြတ်တောက် ဖတ်တာတွေ လုပ်တာ တွေ့ရတယ်။
ဒါပေမယ့် ပြည်တွင်း သတင်း ကျတော့ ဗဟို ချုပ်ကိုင်တဲ့ စနစ်ဖြစ်သွားတယ်။ နေပြည်တော်ကနေ နေ့လယ် ၁ နာရီနဲ့ ည ၈ နာရီမှာ သတင်းတွေပို့ပေးတာ ရှိတယ်။ အဲဒါကို လွှင့်ပေးရတယ်။ အဲဒီလို ထိန်းချုပ်မှု ရှိတယ်။ ကျနော်တို့ရဲ့ အစီအစဉ် တွေကိုလည်း ကျနော်တို့က FM တွေမှာ လွှင့်ချင်တယ်ဆိုရင် ကျနော်တို့ဟာတွေကို နေပြည်တော်ကို ပို့ပေးရမယ်၊ နေပြည်တော် ကနေမှတဆင့် နည်းနည်းတော့ ကြည့်ဦးမယ်ပေါ့။ လောလောဆယ်တော့ လုပ်ဦးကွာ ဆိုတာမျိုး လွှတ်ပေးမယ် ဆိုတဲ့သဘောပဲ။ အရင်ကဆို CNN တို့ဘာတို့ကို ဖြတ်တာရှိတယ်၊ ခုတော့ မဖြတ်သလောက်ပါပဲ။ ကျနော် သူတို့ရဲ့ ထိန်းချုပ်ခန်းထဲ သွားကြည့်တယ်။ လူလေး ၂ ယောက်လောက်နဲ့ လုပ်နေတာပဲ။ ဘာရယ်မှ မဟုတ်တော့ဘူး၊ အဓိကက အဝတ်အစားတို့ ဘာတို့ ကြည့်တယ်။ ဥပမာ – CNN ကလာတာမှာ ဘီကီနီတွေ သိပ်များနေတယ်ဆိုရင် ဖြတ်ပစ်တယ်ဗျာ အဲဒီလောက်ပါပဲ။ မြန်မာ့ယဉ်ကျေးမှုနဲ့ မကိုက်ဘူး ဆိုတာတွေပေါ့။ နောက် CNN ကနေ ထပ်ခါထပ်ခါ လွှင့်နေတဲ့ မြန်မာနဲ့ပတ်သက်တဲ့ အကြောင်းတွေဆို ဖြတ်ပုံရတယ်၊ ပထမ တခေါက်တော့ လွတ်ချင်လွတ်မှာပေါ့လေ။ လွတ်လည်း လွတ်တယ်နဲ့ တူတယ်။ မကြော်ငြာဘဲ လွှတ်လိုက်တာမျိုးတွေ ရှိတာကိုး။
မေး။     ။ ပြည်တွင်းကလူတွေက ပြည်ပက DVB ပဲဖြစ်ဖြစ်၊ BBC ပဲဖြစ်ဖြစ်၊ တခြား CNN တို့ဘာတို့လည်း ကြည့်တာက မြန်မာသတင်းကို ပိုကြည့်တာဆိုတော့ ပြည်တွင်းမှာ ဒီအပိုင်းနဲ့ ပတ်သက်လို့တော့ လိုသေးတယ်လို့ ပြောချင်တာလား။
ဖြေ။     ။ လိုသေးတာပေါ့။ ကြည့်တာမပြောနဲ့ ကျနော့်ဆီကဆိုရင်လည်း ရေဒီယိုတောင် ဝင်ဖို့ မလွယ်သေးဘူးဗျ။ မဖြစ်နိုင်သေးဘူး။ ခုနက ပြောတဲ့ ကမ္ဘာ့သတင်းလို ဟာမျိုးပေါ့။ ကမ္ဘာ့သတင်းကလည်း ပြည်တွင်းမှာ ပြောရရင် capacity သိပ်မရှိသေးဘူးလေ။ ဒီလောက်လုပ်ရရင်ပဲ မဆိုးဘူးလို့ ပြောရမှာပေါ့။ ပြည်တွင်းမှာ လုပ်နေတဲ့ ကမ္ဘာ့သတင်းဆိုတာက သူတို့မှာ အပြည့်မလုပ်နိုင်သေးဘူး။ နောက် သူတို့လုပ်နေတဲ့ ပုံစံက CCTV ရုပ်သံ သတင်းတောင်မှပဲ သတင်းမလာခင် ဖတ်ပြတဲ့သူက သတင်းတပုဒ်လုံးကို ဘာသာပြန်ပြီး ဖတ်ပြလိုက်တယ်၊ ပြီးတော့ နောက်ကနေ သတင်းတပုဒ်လုံးကို အစအဆုံး ထိုးပြလိုက်တယ်။ သူတို့ ဘာကြောင့် ဒီလိုလုပ်နေတယ်ဆိုတာ ကျနော်တော့ နားမလည်ဘူးဗျ။ အဲဒါမျိုးတွေ ပြုပြင်ဖို့တော့ ကျနော် အကြံပေးခဲ့တယ်။
မေး။     ။ ပြည်တွင်း မီဒီယာတွေကော ဘယ်လို အခြေအနေရှိလဲ။ ဒီနှစ်ထဲမှာလည်း အရင်ထက် တော်တော်လေး ရေးခွင့်ရနေပြီလို့ ထင်တယ်လေ။
ဖြေ။     ။ သူတို့လည်း ရေးတော့ ရေးတယ်ဗျ။ ဒါပေမယ့် စိတ်ဝင်စားစရာ ကောင်းတယ် ငြင်းခုန်ပွဲလေး တခုလည်း ကျနော် တွေ့ခဲ့တယ်။ ဘယ်သူနဲ့ ဘယ်သူလဲ ဆိုတာတော့ ကျနော်မပြောတော့ဘူးဗျာ။ တယောက်က ပြောတယ်ဗျ အခုက အခြေအနေ တော်တော် ကောင်းတယ်ပေါ့နော်၊ နောက်ပိုင်းမှာ မီဒီယာဥပဒေလည်း ထွက်လာတော့မယ် ဆိုတော့ မီဒီယာ ဆင်ဆာ အပိုင်း လုံးဝ ပျောက်သွားမယ်ပေါ့၊ ထုတ်တင် ဆိုတဲ့နေရာမှာလည်း တကယ်တန်း ဖတ်နေတဲ့သူက ၁၇ ယောက်ပဲ ရှိတယ်ပေါ့လေ၊ အဲဒီ ၁၇ ယောက်က တကယ်တမ်းကျတော့ ကျကျနန ဖတ်နိုင်တာမဟုတ်ပါဘူး၊ ဒီလိုပဲ ကြည့်ပြီး လွှတ်ပေး လိုက်တာပါဗျာတဲ့၊ သူတို့ဆိုရင် ပြဿနာမရှိဘူးတဲ့ အဲဒီလူက ကျနော့်ကို ပြောနေတယ်။
အဲဒီအချိန်မှာ နောက်တယောက်က ဝင်ပြီးတော့ ဒါကတော့ လူကွာတာကိုးဗျတဲ့။ စကားများကြတာပေါ့ဗျာ။ အဲဒီ ဒုတိယလူက ပြောတာက ရတဲ့သူတွေဆိုရင် NLD ဆိုပြီး ရေးတယ်၊ ရနေကြတယ်၊ သူတို့ကျတော့ မှတ်ပုံမတင်ရသေးသော NLD ဆိုပြီး နာမ ဝိသေသနကြီး ထည့်ထည့် ရေးရတယ်တဲ့။ သိသိကြီးနဲ့ အောင့်သက်သက်ကြီး လုပ်နေရတယ်တဲ့။ ဒါကဥပမာပေါ့နော်၊ တခြားဟာတွေ ရှိသေးတယ် ဆိုပြီး အပြန်အလှန်ပြောနေကြတာ ကြားခဲ့ရတယ်ဗျ။ အဲဒီတော့ ရေးခွင့် ရမရ ဆိုတဲ့ နေရာမှာလည်း နည်းနည်းလေးတော့ လူပေါ်မှာ မူတည်တယ်လို့ ပြောရမလား မသိဘူးဗျ။ တချို့ကလည်းပါးပါးလေး လုပ်တယ်၊ တချို့ကလည်း အဆက်အသွယ်နဲ့ ရဲရဲတင်းတင်း လုပ်နေကြတာလေးတွေ ရှိတာပေါ့ဗျာ။
မေး။     ။ အခုအချိန်မှာ အင်တာနက်နဲ့ ပတ်သက်လို့လည်း ပြည်တွင်းမှာ တော်တော်လေး ကျယ်ပြန့်လာပြီဆိုတော့ ဂျာနယ်တွေက သတင်းတွေကို ချက်ချင်း တင်လာတာတွေ ရှိလာတယ်၊ အဲဒီတော့ ပြည်ပမီဒီယာတွေ မရှိနိုင်တော့ဘူး၊ တချို့လည်း ရှိရဦးမယ်ဆိုတဲ့ အငြင်းပွားမှုလေးတွေ ကြားလာရတယ်။ ကိုသန်းလွင်ထွန်းအနေနဲ့ အဲဒါကို ဘယ်လိုမြင်လဲ။ ဂျာနယ်ကို ထိန်းချုပ်ထားပေမယ့် အင်တာနက်ဥပဒေက သေချာမရှိသေးတော့ ပြည်တွင်းက မြန်ဆန်လာတာမျိုး တကယ် ရှိနေပြီထင်လား။
ဖြေ။     ။ လက်ရှိအချိန်မှာတော့ မြန်မာပြည်မှာက လုပ်ရကိုင်ရတာ ကန့်သတ်ချက်တွေ ရှိနေတယ်ဗျ။ တကယ်တမ်း လွတ်လွတ်လပ်လပ် လုပ်ချင်တယ် ဆိုရင်တော့ အပြင်ကပဲ လုပ်ရဦးမှာပဲ ကျနော့်စိတ်ထဲ ထင်တာ ပြောတာ။ တခုရှိတာက အပြင်က လုပ်တဲ့နေရာမှာလဲ ကိုယ်နဲ့သိတဲ့သူ၊ ကိုယ့်အဆက်အသွယ်လေး တယောက် နှစ်ယောက်ကိုပဲ မှီခိုပြီး လုပ်တယ်၊ ထိတွေ့မှု ဘက်ပေါင်းစုံ မရှိဘူးဆိုရင်တော့ အမှားအယွင်းတွေ ရှိမှာပေါ့။ အမှားအယွင်းကလည်း သေချာပေါက် ရှိမှာပဲ။ ပြည်ပကနေ တယ်လီဖုန်းနဲ့ပဲ လုပ်နေရတယ်၊ ဖုန်းနဲ့ စကားပြောတယ် ဆိုတာကလည်း တကယ်တမ်း နာရီဝက် အပြင် ပိုမပြော နိုင်ဘူးလေ။အထဲထဲမှာတော့ မြင်ရတယ်၊ သိုင်းသိုင်းဝိုင်းဝိုင်း လှည့်ပတ်ပြောနိုင်တယ်ဆိုတော့ တူတော့ မတူဘူးပေါ့။ သတင်းပိုင်း ဆိုင်ရာမှာ ပြောတာပါ။ ဒါပေမယ့် လွတ်လွတ်လပ်လပ် အန္တရာယ်ကင်းကင်းနဲ့ လုပ်နိုင်တဲ့နေရာကျတော့ ပြည်ပက အားသာချက် ရှိတာပေါ့။
ဒါပေမယ့် တခုရှိတာက ဂျာနယ်တွေကတော့ အခုထိ တပတ် နောက်ကျနေတုန်း ဆိုတာကလည်း ရှိနေသေးတယ်။ ရေးခွင့် မရသေးတဲ့ အကြောင်းအရာတွေ ရှိနေသေးတယ်။ ဥပမာ တိုင်းရင်းသား ဒေသ စစ်ပွဲတွေကိစ္စတွေပေါ့။ ပြည်ပ မီဒီယာ တွေလည်း တနေ့ ပြည်တွင်း ဝင်ရမှာပါပဲ။ ဒါပေမယ့် ဟိုဟာ မရေးရဘူး၊ ဒီဟာ မရေးရဘူး ရှိနေတဲ့ အချိန် ဝင်သွားရင်တော့ မဟုတ်သေးဘူးပေါ့ဗျာ။ လိုက်ကန့်သတ်နေရင်တော့ မဝင်ကြနဲ့ပေါ့။
နောက်တခုက အပတ်စဉ် ဂျာနယ်တွေနဲ့ပတ်သက်လို့ ပြောဖြစ်တာရှိတယ်။ သတင်းသမားတွေ အားလုံးနဲ့ ဆုံတဲ့အချိန်မှာတော့ မပြောဖြစ်ဘူး၊ လူတယောက်တည်းနဲ့တော့ ပြောဖြစ်ခဲ့တယ်။ ဘာလဲဆိုတော့ နောက်ပိုင်းမှာ နေ့စဉ်သတင်းစာ ပေါ်လာပြီဆိုရင် နေ့စဉ်သတင်းစာကို လုပ်နိုင်တဲ့သူတွေကတော့ အပီအပြင်လုပ်ကြတော့မယ်။ အဲဒီအခါကျ ဂျာနယ်တွေရဲ့ ကဏ္ဍက မှေးမှိန် လာလိမ့်မယ်ဗျ။ ဒီ ပြဿနာရှိသွားပြီဆိုရင် ဂျာနယ်တွေက သေသေချာချာ အနှစ်ပြည့်ပြည့်နဲ့ တပတ်စာကို သေချာ ရေးပြ နိုင်တာလောက်ပဲ ကျန်ခဲ့လိမ့်မယ်။ အခုလို အဲဒီလောက်များတဲ့ ဂျာနယ်တွေ ဆက်ရှင်သန်ဖို့တော့ မလွယ်တော့ဘူး။ သူတို့အချင်းချင်း ပေါင်းရင်ပေါင်း၊ ဒါမှမဟုတ် သူတို့လူတွေက နေ့စဉ်သတင်းစာတွေထဲ ဝင်သွားရင်ဝင်သွား၊ အဲဒီလိုပဲ ဖြစ်သွား လိမ့်မယ်။ ကျနော်တော့ တကယ့် သူဌေးကြီးတွေက နေ့စဉ်သတင်းစာကို အရမ်းစိတ်ဝင်စား နေပြီ၊ လုပ်ခွင့်ရဖို့ ချောင်းနေပြီ၊ ပြင်ဆင်နေပြီ ဆိုတာမျိုးတွေလည်း ကြားခဲ့ရတယ်။
မေး။     ။ VOA အနေနဲ့ကော ပေါ်လစီပြောင်းမလား။ အခုဆို အထဲမှာ FM တောင် ထပ်ဆင့်လွှင့်ခွင့်ရတော့မှာ ဆိုတော့လေ။
ဖြေ။     ။ VOA မှာက ဘာပေါ်လစီမှ အစကတည်းက ရှိတာမှ မဟုတ်ဘဲ။ VOA လုပ်တာလဲ ခင်ဗျားတို့ တခြားမီဒီယာတွေ လုပ်သလိုပဲ၊ ဂျာနယ်လစ်ဇင်နဲ့ သူ့ ချာတာနဲ့ပဲ လုပ်နေတာပဲ။ ပေါ်လစီတွေချပြီး မြန်မာအစိုးရကို တိုက်ဖျက်ရေးတို့ ဘာတို့ ဆိုတာတွေလည်း ရှိတာမှမဟုတ်ဘဲ။ အမေရိကန်ရဲ့ မူဝါဒကို အသားပေးပြီးဖော်ပြရေး ဆိုတာမျိုးလည်း မပါဘူး။ အမေရိကန်ရဲ့ မူဝါဒတွေကို ဘက်ပေါင်းစုံ၊ အလွှာပေါင်းစုံကနေ ဆွေးနွေး အကြံပြုရေး ဆိုတာမျိုးပဲ ရှိတယ်။ ရှင်းရှင်းပြောရရင် ဒီလိုအခွင့်အရေး ရလာလို့လည်း ဘာပြောင်းစရာမှမရှိဘူး၊ ကိုယ်လုပ်စရာရှိတာ လုပ်နေမှာပဲ။ အခုဆိုရင် ပြည်တွင်းက FM တွေမှာ မြန်မာသတင်းကလွဲလို့ ကျနော်တို့ရဲ့ အစီအစဉ်တချို့ကို လွှင့်ဖို့ သဘောတူညီချက်ရတယ်၊ လက်တွေ့တော့ အကောင်အထည် မဖော်နိုင်သေးဘူး။ အဲဒါကို ကျနော် ဝမ်းသာအားရ လက်ခံတယ်။ ဘာကြောင့်လဲဆိုတော့ ဟိုကနေ လွှင့်ပေးမယ်လို့ ရွေးလိုက်တဲ့ အစီအစဉ်တွေက အထူးသဖြင့် အင်္ဂလိပ်စာ ပို့ချချက်လိုမျိုး၊ ကျန်းမာရေးကိစ္စ၊ ဒါတွေက မြန်မာပြည်မှာ FM တွေကနေ ပိုပြီး ကျယ်ကျယ်ပြန့်ပြန့် ကြားသင့်တာတွေ။
VOA ရဲ့ မူလအစီအစဉ်ကျတော့ သူက တနေ့ကို ၃ နာရီခွဲ အသံလွှင့်ပေးနေတယ်။ အဲဒီအပြင်ကို ၂ နာရီခွဲ ထပ်ဆင့် လွှင့်ပေးနေတော့ VOA က တနေ့ကို ၆ နာရီ လွှင့်ပြီးသားပဲ။ ဟိုဟာက အမြတ်ထွက်တာ။ ဒီတော့ VOA က ပေါ်လစီလည်း ပြောင်းစရာမလိုဘူး၊ ရသမျှကို အမြတ်အနေနဲ့ ယူရုံပဲ ရှိတယ်။ ဒီလို ပြောပါများလို့ ကျနော့်ကို မပေးတော့မှာတောင် ကြောက်တယ်။
ပြောချင်တာက ကျနော်တို့က ပုံမှန် ၁ နာရီလွှင့်နေတာရှိတယ် ဆိုပါတော့။ အဲဒီအထဲကမှ ခုနက အစီအစဉ်တွေကို ဆွဲထုတ်ပြီး အထဲကို ပို့လိုက်မှာ။ ဒီတော့ FM တွေကလည်း တနေ့လုံး သီချင်းတွေချည်းပဲ လွှင့်နေမယ့်အစား အဲဒီနေရာမှာ ကျနော်တို့ အစီအစဉ်လေးတွေကို အစားထိုးပေးလိုက်မယ်။ ကျနော်တို့အတွက်ကော၊ လူတွေအတွက်ကော မြတ်တယ်။ အားလုံးက တဖြည်းဖြည်း လုပ်ယူကြရမှာ။ ရှင်းရှင်းပြောရရင် ပြန်ကြားရေးဝန်ကြီးဌာနက လူတွေအနေနဲ့လည်း မသိဘူးတော့ မဟုတ်ဘူး၊ သူတို့ သိတာတွေရှိတယ်၊ ဘောင်တခု ရှိနေလို့သာ အဲဒီဘောင်ထဲမှာ နေနေကြရတာလေ၊ လုပ်ပိုင်ခွင့် တဖြည်းဖြည်း ကျယ်လာရင် သူတို့လည်း လုပ်ကြမှာပါ။ လုပ်ချင်ကိုင်ချင်စိတ်တွေ ရှိကြပါတယ်။ ဒီလူတွေ အကုန်လုံးက နိုင်ငံတကာ သွားဖူးတယ်၊ သတင်းစာသင်တန်းတွေ တက်ဖူးကြတာပဲ။ ကျနော်တို့သွားတော့လည်း တော်တော်လေး လှိုက်လှိုက်လှဲလှဲ ရှိပါတယ်။
မေး။     ။ ဒါဆို ဒီခရီးစဉ်ကို အောင်မြင်တယ်လို့ ပြောနိုင်လား။
ဖြေ။     ။ အဲဒီလောက်ကြီး လက်မထောင်ရင်တော့ ပြဿနာ ရှိတယ်ဗျ။ အခုဟာက ဘာတခုမှ အကောင်အထည် ဖော်ရ သေးတာမဟုတ်ဘူးလေ။
ဝန်ကြီးက သဘောတူလိုက်ပြီလို့ ပြောရတာကလည်း ကျနော်မပြောရင် ဘယ်သူမှ သိမှာ မဟုတ်တဲ့ အတွက် ပြောရတာ။ အဆင့် တဆင့်တော့ ဖြစ်လာခဲ့တယ်လို့ ပြောလို့ရပါတယ်။ အစက သူတို့ပြောတာ နားထောင်ကြည့်မယ်၊ ကျနော်လိုချင်တာ ပြောကြည့်မယ်၊ ရရင်လည်း ရ၊ မရရင်လည်းနေ။ ဒါပေမယ့် သူတို့နဲ့ တွေ့ကြည့်မယ်၊ အထဲထဲမှာ လူတွေနဲ့ စကားပြောခွင့်ရမယ်၊ ဒါ ကိုယ့်အတွက် အမြတ်ပဲလို့ဆိုပြီး သွားတာ။ ကျနော် လိုချင်တာထက် နည်းနည်းပိုပြီး ရခဲ့တယ်ပေါ့။ အခုဆို ရုပ်သံကိစ္စပါ ပါတယ်၊ ကျနော်တို့ ရုပ်သံကလည်း တိုးချဲ့ဖို့ လုပ်နေတယ်။ နေ့စဉ် အစီအစဉ်တွေ တိုးချဲ့မယ်။ ဒါတွေ ကိုလည်း ရေဒီယိုလိုပဲ ဖြတ်ပြီး ယူချင်တယ်ဆိုတာမျိုး ပြောတယ်။
မေး။     ။ ပြည်တွင်းက ပြန်လာပြီ၊ မီဒီယာသမားတွေနဲ့လည်း တွေ့ခဲ့ပြီဆိုတော့ လက်ရှိ ပြည်ပမီဒီယာတွေကို ဘယ်လိုမြင်လဲ။
ဖြေ။     ။ ဒီလောက်ကြီးတော့ ဝေဖန်စရာ မရှိပါဘူး။ ခင်ဗျားတို့ဆို ကျနော်တို့ထက်တောင် အနီးကပ် ပိုလုပ်နိုင် ကြပါ သေးတယ်။ ဒါပေမယ့် ကျနော် နည်းနည်း မျက်နှာပူခဲ့ရတာ လေးတော့ရှိတယ်။ ဒါက ကျနော် လွှတ်တော်ထဲ ရောက်တော့ လွှတ်တော် ဒုဥက္ကဋ္ဌနဲ့ စကားပြောတဲ့အခါမှာ သူပြောတာက ပြည်ပမီဒီယာတွေမှာ တခါတလေ အရမ်းလုပ်တာတွေ ရှိတယ်၊ ရည်ရွယ်ချက်ထားပြီး လုပ်တာလား၊ ဘာလားတော့ မသိဘူးတဲ့။ မှားပြီး ဖော်ပြရင်လည်း ပြင်ဆင်မှု မပေးတာရှိတယ်တဲ့။
အဲဒီတော့ ကျနော်လည်း သေချာပြောပြပါ ဘာလဲဆိုတော့၊ စခုန်တိမ့်ယိမ်းကိစ္စကို သူ ပြောတယ်ဗျ။ စခုန်တိမ့်ယိမ်းကို အကျယ်ချုပ် ချခံထားရတယ် ဆိုပြီး ရေဒီယိုတခုက လွှင့်တယ်တဲ့၊ ဒါ နာမည် ပြောစရာ မလိုပါဘူး၊ အားလုံးသိပါတယ်။ အဲဒီလို လွှင့်တဲ့အချိန်မှာ သူတို့က စားပွဲဝိုင်းမှာထိုင်ပြီး လွှတ်တော်ထဲမှာ ဆွေးနွေးနေတာ၊ စခုန်တိမ့်ယိမ်းအပါအဝင်ပေါ့၊ အဲဒီအချိန်မှာ ညဘက် ရေဒီယိုက ကြားလိုက်ရတော့ သူတို့အားလုံးလည်း ရယ်ကြတယ်ပေါ့။ ဒါတွေက အမှန်တကယ်ကို နားလည်မှု လွဲမှား သွားစေတယ်၊ ပြဿနာ တက်သွားနိုင်တယ်ပေါ့ဗျာ။ သူတို့ ပြောတာ ရှိတယ်။
နောက်တခုက သမ္မတရဲ့ အကြံပေးတွေနဲ့ စကားပြောတဲ့ နေရာမှာလည်း သူတို့က ညည်းတယ်။ သူတို့က မီဒီယာကို friendly လုပ်ဖို့ စလုပ် ကြတာပါတဲ့၊ ဒါပေမယ့် သူတို့ကို မညှာမတာ လုပ်လာတာတွေ ရှိတယ်တဲ့၊ သူတို့အနေနဲ့ အလုပ်လည်းများတယ်၊ ဟိုလူက ခေါ်ခိုင်း၊ ဒီလူက ခေါ်ခိုင်းပေါ့ဗျာ၊ အဲဒီလို အလုပ်များနေတဲ့အချိန်မှာ ည ၁၂ နာရီလောက် ဖုန်းခေါ်ပြီး အတင်း ဖြေခိုင်းတာမျိုးတွေလည်း ရှိတယ်တဲ့။ ဒါပေမယ့် သည်းညည်းခံပြီး ဖြေပေးပါတယ်တဲ့။ ဧရာဝတီနဲ့ ပတ်သက်လို့တော့ ဦးနေဇင်လတ်ပြောတာ ရှိတယ်။ ဧရာဝတီကတော့ မှားတာကို ပြင်ပေးတယ်တဲ့။ ဒါပေမယ့် တခြားတခုက မပြင်ပေးတာ ရှိတယ်၊ အဲဒီကိစ္စကိုတော့ စိတ်ဆိုးတယ်တဲ့။ အဲဒါကြောင့်လည်း သူတို့တွေ အနေနဲ့ မီဒီယာကို စကားပြောတဲ့ နေရာမှာ ကန့်သတ်တာတွေ၊ မှတ်တမ်းတွေ ထားနေရပြီတဲ့။ ဘယ်သတင်းဌာနဆိုပြောမယ်၊ ဘယ်သူ့ဆို မပြောဘူးဆိုတာမျိုး ထားနေရပြီတဲ့။ ဒါက သူတို့ ပြည်ပမီဒီယာတွေ အပေါ်မှာ ထားတဲ့ သဘောထားပေါ့နော်။
အခုအချိန်မှာတော့ ကျနော်မြင်တာက ၂၀၁၄ အတွက် ပြည်ပမီဒီယာတွေ ဝင်လာရင် Press Release တွေ ထုတ်ပေးနိုင်ဖို့ တကယ့်ကို အင်္ဂလိပ်လို ရေးနိုင်တဲ့ သူတွေနဲ့ ပြင်ဆင်နေတာမျိုး ရှိပုံရတယ်။ မီဒီယာလွတ်လပ်ခွင့် တကယ် ရမရ ကတော့ ကျနော်လည်း မပြောနိုင်ဘူး။ တကယ်ရမှပဲ ရပြီပေါ့ဗျာ။
အစိုးရအနေနဲ့ ပြည်ပမီဒီယာတွေကို ကြိုက်တယ် မကြိုက်ဘူး ဆိုတာထက် သူတို့ဘက်ကလည်း သူတို့ ဘောင်ထဲကလုပ်မယ်၊ ပြည်ပမီဒီယာတွေကလည်း လုပ်နေကြတယ်ပေါ့ဗျာ။ ဒါပေမယ့်သူတို့ဟာက အစိုးရရဲ့ သတင်းထုတ်ပြန်ရေးဌာနပဲ၊ တကယ့် ဂျာနယ်လစ်ဇင်နဲ့ လုပ်နေကြတာတော့ မဟုတ်သေးဘူး။